الخميس، 29 مايو، 2008

<<< ( ABOOKARTONA )>>>>>

مشينا كتير.. تعبنا كتير..مشينا لحد ماتعبنا


أسكوتو مش أنا رحت حفلة التوقيع وأخدت وصفة المرواح ودي وصفه سهله الله الله ودي وصفه هايله الله الله


وطول الطريق ماشيا بحلم أما اشوف رحاب ابي هعمل أيه أما أشوف سو العجوز اللي كلمة السر كانت أبو كارتونه


وأول واحد كان ناسيها هوا ههههههههههههه أو لو شفت أي حد من الناس الجامده ديه اللي عرفتهم في دنيا الخيال


وخلاص هشوفهم في الحقيقه واليكم يا اخوالنا ما حدث:


من امبارح وانا قاعده بحلم بالرحله اه وربنا كنت عامله زي الطفله اللي رايحه رحله وقولت مش هروح لوحدي كلمت


صديقتي الصدوقه أمنيه مونتي بونبونتي وأتفقت معاها اننا ننزل تمام ونزلنا في حتت معاد اتقابلنا الساعه 4في عزالحر


بس مش مهم يلا بقي وربنا عمري ما عملتها المهم اتقابلنا وكانت وصفة سو باشا ان المكتبه فوق فلفله لوووووول


حلو أوي دي منطقتي يا أخوالنا دا انا بركب من هناك كل يوم المهم اما وصفلي قالي ان فلفله اول طلعت حرب من


ميدان التحرير متعرفوش بقي انا استزكيت وأفتكرتو فلفله اللي في 26يوليوعلي حسب وصف وانا بي افيزك


المهم نزلنا الاسعاف وكلي ثقه ورايحه ناحية فلفله اللي في اول الشارع هناك المهم ببص كده مفيش فلفله أروح


وأجي فين فلفله مفيش يا لهوي ي ي ي شالو فلفله !!!!!!!!!!!لاقيت راجل صاحب محل بقولو فين يا عمو فلفله


لوسمحت قالي فلفله قفل ؟؟يا خرابي قفل علي حظي هئ هئ هئ عااااااا هئ طيب يا عمو في مكتبه اسمها


عمرو بوك استورز !! قالي نعم عرفت بقي ان عمو ميعرفهاش الراجل لاقي وشي كعبر كده وقفل شفق في


حالي وقالي علي فكره في فلفله تاني يمكن هوا اللي انتي قصدك عليه قولتيله فين قالي في أخر طلعت حرب


ووصفلي الطريق ووروحنا ومشينا كتير..وتوهنا كتير ..ومشينا لحد ماتعبنا هههههههههه داحنا هيسنا تهيس


من الشمس والحر ووصلنا أخيرا الي المكان ولاقينا فلفله يا جدعان ولاقيت عمو كده واقف عالباب بقوله لو


سمحت مكتبة عم مكملتش الكلمه لاقيته فوق قولتله نعم راح باصصلي شزرا وقالي بقولك فووق خلاص يا عم


متزوئش وطلعط فوق ولا لاقيه زحمه ولا حاجه قولت يا واد طنش خالث واطلع يا ناس الاقيلكو ايه اتنين نازلين


من عالسلم ولاتنين دول بصولنا كده بصه غريبه ومريبه ما علينا طلعنا والمكتبه يالهوي هص هص في المدونين


فين الحفله فنانه مفروسه انا يا ناس انا هنا يا بشر ولا حياة لمن ينادي المهم لاقيت واحد واقف وسألت عالكتاب


وأشتريته وسالني ان كنت مدونه وقولتيلهم أسم المدونه وسألته عالناس وابي مجتش طيب أحمد الصباغ اللي عامل


أعلان بالحفله التانيه مجاش طيب سوووو العجوز قالولي سو لسه نازل يا نهار هوا ده الشخص اللي كان نازل عالسلم


طلع سوووووو يا نهار وأنا معرفش طيب يا جماعه هما رايحين فين كده قالولي هما طالعين علي البورصه يالهوي ي


البورصه يعملو ايه ف أمنيه شادتني وقالتلي البورصه ديه قهوه يا غبيه اه ه ه مانا عارفها طبعا طيب هي فين يا


جماعه فاتبرع الشخص المحترم واللي اسمه استاذ ابراهيم عادل صاحب مدونة أنا أنا واللي اتشرفت بمعرفته


المهم اتبرع انه يورينا الطريق لسه نازلين الشارع ولاقينا لسه سووو ماشي هوا والانسه اللي معاه صاحبة مدونه


جديده لسه ورايحين عالبورصه المهم قولنا لاستاذ ابراهيم شكرا احنا هنمشي ورا سوو اصله كان مميز أوي بالكسكته


اللي كان لابسها المهم مشينا لحد ماوصلنالهم وسوو بيلف واره كده فقولتيله لو سمحت أبو كرتونه أنه يعرفني


ابدا المهم في الاخر عرفني وعرفني علي البنوته اللي كانت معاه بس هو عرفنه ببعض بأسماء المدونات مش


أسماء الاشخاص يعني وبعدين سألته علي ابي قالي معرفش اذا كانت عالبورصه ولا لا قولتلهم خلاص هنمشي


وراكو لحد ما نوصل ونشوف هموت واشوف ابي وربنا المهم وصلنا وملقيناش حد أيه الحظ ده يا رب ماعلينا


بس لاقيت احمد الصباغ قاعد من بعييد شوفته وكان نفسي اقوله شكرا عالحفله الجامده بس يلا مش مهم بقي اكمنه هوا


اللي منوه المهم سووو كلم ابي وسألها جايه ولا لا وكانت الصدمه أنها مش جايه بس أنا كلمتها في التليفون وكنت فرحانه


جدا اني كلمتها والله صوتها ما شاء الله جميل جدا وحونين كده الله يسهلووووو يا أستاذ أسلام وسلمنا علي سوو


ومشينا ودي كانت تفاصيل اليوم زي ما طلبط مني أحكي واحده مفروسه والله أنا زعلانه وفرحانه وتعبانه وكل


حاجه في قلب بعضيها بس يلا ماليش نصيب أشوف حد ...........


الكتاب ماشاء الله جميل جدا هايل والبوستر بتاع الكتاب تحفه ماشاء الله يلا بقي أن شا الله ما حد حوش ورجعت أنا


وصحبتي نجرجر أذيال الهزيمه يا حسرتي عالمشوار يلا اللي طرقع اليوم كله من غير نتيجه يلا مش مهم


_____________________________________________________


خلاص يا عالم جالك الامتحان يا تارك المذاكره هئ هئ هئ عااا ااااااااااااااا أدعولي شكرا .سلام يا أخواني






الاثنين، 26 مايو، 2008

وحشتوني..وحشتوني..وحشتونييييييييييييييييي


وحشتوني أوي وصوابعي أكلتهم خلاص خلصت علي تلات صوابع وداخله اهه عالرابع عايزه أخلص الامتحانات بقي


وأرجع تاني وخلاص داخله اهه عالننظري وأنا عامله نفسي نايمه وأنا عامله نفسي نايمه!!!!!!!!!!!!!!!!!!


المهم أتفرست أوي لما عرفت حوار حفلة التوقيع ومحدش قال يلا مش مهم قدر الله وما شاء فعل بس أن شاء الله


هروح يوم الخميس يا جماعه بليز اللي هيروح يقولي عشان مدبش المشوار عالفاضي وملاقيش حد واطلعه عليكو


وربنا وبرضو اللي عارف يقولي أروح أزاي من التحرير أو 26 يوليو عشان برضو ماتوهش وأطلعه عليكو


المكان ____مكتبة عمر بوك استورز


الزمان____2008/5/29


معلش هنوه تاني اللي هيروح يا ريت يقولي في الكومنتات ربنا يكرمكو يا جماعه والله لو كان حتي الامتحان يوم الخميس


أن شاء الله هروووح برضو ماشي.


كلمة السر (ABO KARTONA)



أشوفكو علي خير أن شاء الله _______________________ سلام

الأربعاء، 14 مايو، 2008

يوم الأمتحان يهان المرء أو يهان !!!!!! ربنا يستر


بقي اللي ذاكر ذاااااااااااااكر من زمااااااااااااااااااااااااااااااااااااااااااااااااااااااااان ن ن ن !!!!!!!!!!!!!!!!!!!!!!
واللي ذاااااااااااااااكر من زماااااااااااااااااااااااااااااااااااااااااااا ن ن ن ن ن زمانه نسي اساسا!!!!!!!!!!!!!!!!!!
نستنج أيه بقي ان ربنا يسترها علينا ان شاء الله ونعدي والله انا خايفه.
وبما أني في كليه عملي (تربيه فنيه) حبيبشي حبيبشي يعني الكليه ديه والله المهم بما أني في عملي فالنظري بيشكل
بالنسبه ليا الارف والمغص والضغط لأني مش متعوادا دايمن اذاكر فبااخد فتره طووووووووويله علي ماستوعب
المواد اصل اختكو ذكيه هههههههههههه من يومها وبما أني برضو عندي مادتييييييييين بحالهم ربنا يا رب يصبرنا
عالصيف وبلاويه واللي بيجرا فيه أيه يلا مضطرين نذاكرهم خلينا نخلص بقي من الكليه اللي خلصت علينا وعلي
فلوس أبويا ديه دعواتكوو يا خوالنا معانا .
وربنا عندي مواضيع كتييييييييير عايزه أنزلها ومظبطاها ومخلياها ايه بس الوقت كالسيف اذا لم تقطعه قطعك حتت
حتت ورماها للقطط نياياياياوووووو.
حبايبي الحلوين عايزه تركيز غير عادي في الدعا ليا مش عليه خلو بالكو كويس أووي ده مستقبل وبكاليريوس
يا عالم مش هزار المهم الدعا متواصل لاحد اخر الشهر ان شاء الله أدعو بظاهر الغيب عشان يرد عليكو الملك بلك
مثله.
الدعاوي تتركز أوي في الفتره ديه اطلعو في البلكونات من9الي3 فترة العملي... واخد خفيف يقولي هعد ادعي ست
ساعات في الشمس يا مفتريه أقوله يا حدء هاتلك تانده من كبنوري بالتقسيط وأقف ادعي براحتك.
بالنسبه للنظري اللي اخر الشهر عايزه همتكو معانا من9الي 12 واللي قاعده اذاكر فيه من دلوقت يا عالم ومش
فاهمه حاجه في مادتين الغباء اللي انا باخدهم دول مالي انا بالمعارض والمتاحف والكلام الفارغ ده ومالي ومال
المحروس من العين بيكاسو وسيزان باشا ولا جوجان... الناس زي الفل وانا مبحبش اجيب في سيرة حد اساسا
بس نقول ايه بقي...........حسبي الله ونعم الوكيل
همتكو معايا ومين قدم شيئ بيداه التقاه وهنيالك يا فاعل الخير الثواب وعلي رأي الشاعر:
اللي يقدم السبت يلقي الحد والاتنين والتلات والاربع والخميس والجمعه أجازه............
أيه الشاعر الاهبل ده يلا ماعلينا مش مهم المهم تركزو معايا محتاجه مسانتدكم تعاطفك لوحدو مش كفايه تبرع ولو
بدينار ويستحسن كويتي سوقه ماشي حلو أوي ههههههههههههههههههه
أ دع ول ي ي ي ي ي ي ي ي
علي فكره البوست الجاي قصه أمريكاني مترجمه تخيلتها مصري وهنقلكو تخيلي ده وربنا لو لاقيت وقت لانزلها يلا سلام

الأربعاء، 7 مايو، 2008

أسبقني يا قلبي أسبقني....عالفرسه الرابعه أسبقني

تصدقوو 1-4 اللي جاي ده علي طوول المدونه هتم سنه
سنه من عمري فاتت وانا معاكووو وعرفت من خلال شخصية فنانه مفروسه ناس مكنتش اتوقع اني اعرفهم واللي اقل ما يقال عليهم انهم فعلا ناس محترمين اوي ربنا يخليكوو ليا كلكووو وبناء عليه قررنا نحن فنانه مفروسه مفكوسه موكوسه اني اقيم الافراح واليالي الملاح في المدونه لحد يوم العيد ميلاد ومن ضمن الاحتفالات هعيد نشر البوست اللي تحت ده هوا مش اول حاجه كتبتها بس كان بداياتي مع فنانه مفروسه
والبقيه اتيه بس ادعولي الاقي وقت
بحبكككككوووو فالله كلكو
*************************************

أسبقني وقول لحبيبي ..أنا جاي علي طول يا حبيبي..وألحقني أوام ألحقني عالجنه الحلوه ألحقني!!!!!!!!!!!!!!!!


يا سلام يا سلام أما الدنيا تضحك للواحد كده........الله عالدنيا أما تبقي جميله ويا سلام أما تكون بداية اليوم حلوه


كده...أيه الهنا اللي أنا فيه ده يا ربي!!!!!!!!!!!!!!!!!!!!قلبي يبدق يدق مستنيه تلفوني يرن رن رن يرن


ويفرحني؟؟؟؟؟؟؟؟؟؟؟؟؟؟؟؟؟؟أهه رن وفرحني أرد لا أستني شويه لا هرد


ألو..ألو أيوه يا حبيبي..أيه أه حاضر..حاضر هجهز علي طول اهه..أوكي وأنا نص ساعه وأكون جاهزه زمرلي بس


أما تيجي وأنا هنزل علي طول.......

ولبست واتنتكت في أقل من نص ساعه أصل حبي هيعدي عليا ونخرج نتفسح أنهارده!!!!!!!!!!!!!!

بييب بيييب بييييب أيوه نازله علي طول اهه ثواني.

وجري عالسلالم دانا كنت هدئلج علي وشي زي ما بيدئلجو قفص البرتقان بس الحمد لله ربنا ستر والا كانت باظت

الخروجه.ونزلت ولاقيت حبيبي مستنيني في العربيه أيه ده الله علي شياكته ولا أناقته ولا برفانه يا نهار أيه ده

أنا مش مصدقا والله ما مصدقا؟؟؟؟؟؟؟؟؟؟؟؟؟!!!!!!!!!!!!!!!!!!!!!!!

صباح الخير يا حبيبي صباح النور يا قمر !!!!!! يالهوي دا بيقولي يا قمر!!!!!!زي ماتحب انت فسحني علي

ذوقك أوكي سيبيني أنا افسحك علي زوقي هوديكي مكان جميل أوي.

زي ما تحب...........وشغل كاست العربيه وفتح السقف وبقت مكشوفه ولاقيته شغل عبد الحليم وانا قعدت اغني معا

الاغنيه علي قد ما شفت هوان...وأحترت يا قلبي زمان... أهو جالك يوم ترتاح....عل أجمل بر أمان........

وطلع باقصي سرعه في العربيه ولاقيته وصل لحد الصحراوي وهيكمل فقولتيلوأحنا رايحين فين

أنا قولت نطلع علي اسكندريه محضرلك مفجأه هناك.

يا نهار عليك أسكندريه الله انت عرفت منين أني بموت في أسكندريه أنا بعشق بحرها

خلاص يا حبيبتي كلها ساعه الا ربع بالظبط ونوصل وبجد بجد بقي انا حياتي ابتدت من يوم ما شوفتك يا قمر!!!!

بجد ؟؟؟؟؟؟؟؟؟؟؟؟؟؟؟؟؟؟والله ما مصدقا في حاجه غلط يا عالم انا ديه ولا ايه والله هتشل من الفرحه حد يقرصني
يا هووووووووووووووووووووو
حمدالله علي السلامه وصلنا اسكندريه يا جميل.......الله يسلمك.......يعني أعمل ايه يعني اتشل أتشل يعني من الفرحه




ومشي بالعربيه نحيت الشط ونزلنا قالي غمضي عينك عاملك مفجأه حاضر هغمض اهه بفتح لاقيت يافطه كبيييره

مكتوب عليها ياسمونتي حبيبتي يا نهار دا هيبقي الشلل رباعي انهارده وربنا أنا ممصدقا يا ناس يا ناس حد

يقرصني بليييييز مش معقول كده؟؟؟؟؟؟؟؟؟؟؟؟؟؟والاقي موسيقي هاديه وشمع وورد وضوء علي هيئة قلب كبيير

مرسوم عالرمل أيه دا كله كل ده ليا أنا مفيش حاجه في الدنيا تغلي عليكي يا نور عيني

وربنا لايجيلي الرعاش مع الرباعي انهارده وقعدت علي الرمل لاقيته جاي بيقولي يسمحلي القمر بالرقصه ديه المفروض انا في

اللحظه ديه أكون اتشليت خلاص قومت زي القرد مونكي اتنططت علي حيلي وبعدين جالنا واحد بيه قيمه كده لابس بدله

سوده وببيون بيقول العشا جاهز يا فندم يلا يا ياسمونتي نتعشي احسن انتي يا روحي مكلتيش من الصبح

اه يلا اصلي جوعت اوي بصراحه كنت مكسوفه اقوله اني جوعت وجت اللحظه اللي المفروض الشلل يشتغل بجد

ابص بيعيني كده الاقي




طبعا انا ولا همني خالص ولا كان هيوغمن عليا ولا حاجه ابدا وقعدنا والبيه القيمه جه تاني معاه الاكل وطبعا برده انا

عملت نفسي مش جعانه خالص ولا خلصت علي الاطباق ولا دخلت علي طبقه ولا اي حاجه وهوا مببياكولش خالص

وقاعد يبصلي كده اوي ايه مبتاكلش ليه كفايه عليا اشوفك يا حبيبتي وانا مش عايز اي حاجه تاني

أطلبلك أكل تاني يا روحي لا خلاص كفايه هرجع من كتر الاكل تأمري يا قمر يادي النيله بقول حد يلطشني الم

اعرف بيه فين الحقيقه يا ناس مش مصدقا وربنا ما مصدقا!!!!!!!!!!!!!!!!!!!!!!!!!!!!!

ورجعنا تاني عالشط وقعدنا نرغي نرغي في كل حاجه واي حاجه والكلام مبيخلصش خالص واسكت ويتكلم ويسكت


واتكلم

وأحنا قاعدين نتكلم حسيت بهزه كده علي الارض المهم اول مره عملت نفسي مش واخده بالي خالص تاني مره

طنشت رده تالت مره قولت لا بأه مبدهاش الا يطلع تسونامي ولا حاجه وبقوله فيه أيه قالي طول مانا معاكي متخافيش

من حاجه ابدا وبعدين المكان كله بدأ يترج جامد جداولاقيته بيجري وبيبعد وانا قولت اه انا اساسا مش مصدقا

من بدري ولاقيته بيجري بعيد ويقولي اجري يا يا سمونتي انا هحارب الدنيا وهرجعلك يا حبيبيتي انا بحبك جدا

طيب حاضر بس انا نسيت اسألك أسمك ايه والمكان كله بيتهز اجمد واجمد من الاول أسمك ايه قول بسرعه

أسمي م د ح ت أيه اسمك أيه مدحت اسمي مدحت اجري بس دلوقتي أيه الاسم القديم ده في حد

اسمه مدحت دلوقت انا بقول في حاجه غلط اساسا ولاقيت الدنيا بتتكسر والبحر ثائر حاجات بتقع وانا بنادي

مدحت روحت فين يا مدحت رد عليا بلييييييز رد يا مدحتي !!!!!!!!!!مدحت أهئ أهئ مدحت

مدحت مين يا هانم ؟؟؟؟؟؟؟؟؟؟؟؟قومي فزي من النوم الساعه بقت واحده وارانا حاجات كتير عايزين نعملها

واومت علي حيلي اضور علي مدحت تحت السرير اتاري مدحت حلم وانا مش حاساه مش بقولكو من الاول والله

والله مصدقا !!!!!!!!!!!!!!!!!!!!!!!!

ويبقي مين مدحت ده يا ست هانم اللي قايمه تضوريلنا عليه أما يجيلك باباكي هقوله أخليه يموتك الله يقطع التلفزيون

اللي قاعدالنا عليه ليل نهار

وطلع الزلزال هو الست هانم ماما بتصحيني من النوم أهئ أهئ أهئ هاهاهاه حتي مدحت طلع حلم هوا كمان وبعدين

بقي!!!!!!!!!!يلا مش مهم وبعدين حد يعرف حد أسمه مدحت جاتك البلا في زوقك

يلا يا ياسمين هانم تعالي ساعديني طيب حاضر حايه اهه وقومت اساعد ماما وقولت اشغل الراديو اسلي نفسي

ولاقيت المذيعه بتقول ومعدنا دلوقتي مع عبد الحليم وأغنيه أسبقني واديتها ضحك هو انا اسيبها في الحلم الاقيها

في الحقيقيه هيهيهيهيهيهها هاهاهاهاههاهاههههاهاهه

مهو مش انا بقولكو من أول الفرسه أني مش مصدقا والله!!!!!!!!!!!!أه ما أنا عارفه نفسي فقريه ههههههه

ووووووووأسبقني .....أسبقني ............أسبقني ي ي ي ي ي ي ي ي ي ي ي ي




الأحد، 4 مايو، 2008

بلغو عنى ولو ايه


السلام عليكم ورحمة الله وبركاته

ازيكو كلكو انا المره ديه ان شاء الله نويت أعمل اي حاجه لنصرة سيدي وحبيبي ورسولي محمد بن عبد الله ص
ولان مهما عملت مش هوفيه حقه وأختكو أمه ضعيفه مفيش في أيدها حاجه غير المدونه بتاعتها فأخترت موضوع
بلغو عنى ولو ايه وبكده أكون طبقت سنة حبيبي الغالي وساهمت علي اد ماقدر لنصرته بتطبيق سنته.
ومن عندي هنا بدعو كل واحد عندو حاجه بتظهر للناس انه يعمل أي حاجه لنصرة حبيبه صلي الله عليه وسلم
والأيه اللي هبلغها ان شاء الله هي
*************************
قال صلى الله عليه و سلم:"من أحيا سنة قد أميتت بعدي فإن له من الأجر مثل من عمل بها لا ينقص من أجورهم شيئاً
ومن أبتدع بدعة ضلالة لا يرضاها الله ورسوله كان عليه مثل آثام من عمل بها لا ينقص ذلك من أوزار الناس شيئا"
صدق رسول الله صلي الله عليه وسلم
وان شاء الله هقلكو علي سنه لعل وعسي اخد بيها اجر يشفعلي يوم القيامه ان شاء الله.
السنه هي من سنن الصلاة القولية
***********************
1. دعاء الاستفتاح: و هو قوله بعد تكبيرة الإحرام: "سبحانك اللهم و بحمدك و تبارك اسمك، و تعالى جَدُّك، و لا إله غيرك" رواه الأربعة.
و هناك دعاء آخر: "اللهم باعد بيني و بين خطاياي كما باعدت بين المشرق و المغرب، اللهم نقني من خطاياي كما يُنقى الثوب الأبيض من الدنس، اللهم اغسلني من خطاياي بالثلج و الماء و البَرَد" رواه البخاري و مسلم.
2. التعوذ قبل القراءة، أن يقول: "أعوذ بالله من الشيطان الرجيم"
3. البسملة، أي: "بسم الله الرحمن الرحيم"
4. آمين، بعد الفاتحة
وديه سنن حبيبا القوليه اثناء الصلاه ويارب اكون فيدتكو باي حاجه وسامحوني علي ان الموضوع مش بالشكل الائق بس عذري انه
موضوع علي قدي ونفتكر دايما ان حبيبنا قال"تركت فيكم ما إن تمسكتم به لن تضلوا بعدي أبداً، كتاب الله و سنتي"
صدقت يا حبيبي يا رسول الله.
يا رب اكون قدرت اوصل الايه وجزاكم الله خيرا.


اللهم وفقنا لخدمة دينك وأعنا على فعل الخير وسدد بالحق طريقنا وألهمنا رشدنا إنك ولي ذلك والقادر عليه اللهم من اعتز بك فلن يذل، ومن اهتدى بك فلن يضل، ومن استكثر بك فلن يقل، ومن استقوى بك فلن يضعف، ومن استغنى بك فلن يفتقر،ومن استنصر بك فلن يخذل، ومن استعان بك فلن يغلب،ومن توكل عليك فلن يخيب، ومن جعلك ملاذه فلن يضيع، ومن اعتصم بك فقد هُدي إلى صراط مستقيم، اللهم فكن لنا وليا ونصيرا، وكن لنا معينا ومجيرا وارزقنا الإخلاص وتقبل منا يا أكرم مسؤول.

والسلام عليكم ورحة الله وبركاته






الجمعة، 2 مايو، 2008

يا ناس ..........أسمعوا وأعوووووووو

مجرد تنبيه:
اقر أنا واعترف انا ياسمين صاحبة مدونة يوميات فنانه مفروسه جدا
أن أنا عامله المدونه ديه بكتب فيها بناء علي موهبه كانت عندي
من زماااان أكتشفتها متأخر وأقول ان اي حاجه بكتبها فيها حاجات
بسيطه مني كشخص والباقي بيكون مبالاغات وتخيلات بيتطلع مني غصب عني
وبقولهالكو وبنقراها مع بعض.وأي شخص تسول له نفسه أنو يفتكر اللي
تحت هيا انا وانا هيا اللي تحت كشخص واحد هوا حررررررر.
ومش هنبه تاني أنا بقول اهو عقلك في راسك تعرف خلاصك
وللامانه موضوع الحزن بس هوا اللي عني كله واي حاجه تانيه باخد
تفصيله صوغنتوته من حياتي وبنسج عليها باقي الموضوع .
وبرضوا اي حد يقتبس او ياخد حاجه من عندي في حتته تاني هوا حر
انا ليا قرايب في كل حته ياكلو الظلط هههههههه
ان نبهت خلاص وقد زعرر من بنجرر........
أنتهي البيان وشكراااا
ياسمينووووووو