الخميس، 8 أبريل، 2010

وحشتوووووني


وحشتوني كلكووو والله ونفسي ارجع اكتب تاني واتواصل معاكووو تاني بس مش عارفه

وحشتني الكتابه التعليقات والحوارات واللف علي المدونات بس للاسف مش عارفه ارجع تاني

وحشتيني اوي يا فاتيما ويا مفروسه ويا ابي ويا خيخيه ويا داليا ويا مهاميهوو

وحشتني الشقاوه اللي كنت بتشقاها في المدونه

قريب اوي هرجع اقلبها مراجيييح تاني

ادعوولي لو لسه فاكرني

الأحد، 29 مارس، 2009

مفروسه ومتغاظه وهتطق


والله ما عارفه ابدا منيييين

مأنا كل ماقول وانا مالي اشوف حاجه افظع من اللي قبلها !!!!!!!!!!!!! طيب وبعدين معاكو يا بشر وبعدين يا مصرييين هنتغير امتي هيتصلح حالكو امتي حد يرد ويجاوب عليا يا جدعان الا انا نافوخي بيضرب مش هيضرب

بقي انا وانا في الكليه كنت بركب المتروو واقعد في عربيه السيدات وانزل التحرير المحطه اللي قدام المجمع واركب تاكسي انا واصحابي للزمالك عشان اروح كليتي لحد هنا جميييل .... خمس سنين وانا علي الحال ده اتاريني مكنتش بشوف حاجه وكنت اما اسمع حد يقول شوارع مصر ولا زباله ولا اولاد شوارع ولا اي حاجه اهت فيه واقوله يا مفترين يا ظلمه يا كفره فييييييين ده مانا بنزل كل يوم والبلد زي الفل!!!!!!!!! اتاري المترووو والتحرير والزمالك كانو شايللين عني كتتتتتتتتتتتتتتتتير كتتتتتتتتتتتتتتتتتيييييييير

وبعد ماشتغلت الحمد لله وبدأت العربيه اللي بركبها تمشي بييا لارض الواقع واشوووف الناس بقي بخيرها ببهاريزها بسلططتها وبابا غنوجها شووووووفت اللي عمري ما شوفته واأتأكدت اني اكيييدد اكيييييييييييد في مصر.......واليكم يا ساده ما ااراه كل يووم واتأكد منه اني اكييدفي مصررر وااللي يشوفه يتأكد بقي انه في مصر بقي

لو شفت

******

*صندووووق زباله كببببببببببيييير يعني من الاخر كده مقطوره قالبنها صندوووق والناس تسسسيب الصندوق وترمي بره حوالليه اعرف انك في مصر.

* شواررع كانت تمام وكويسه وتتكسر عشان المجاري وتترصف وتتكسر تاني عشان الصرف وتترصف وتتكسر تاني عشان العاز وتترصف وتتكسر رابع عشان خاطر المقاول وتترصف وتتكسر خامس عشان خاطر عيوون حد تاني وتترصف وتتكسر سادس بقي عشان خاطر عيون حد برضو مش هقول ومييييين وفي الاخر تتساب متكسره او تترصف مدغدغه واي كلام يبقي انت اكيييييييد في مصر.

*لو ماشي في طريق سريع وتقعد تتشاهد وبمعدل كل دقيقه تقول يا رب سلم عشان لا السواق اللي راكب معاه مراعي الارواح اللي راكبين معاه ولا العربيات اللي حوالييك مراعيه ده يبقي انت اكييييد في مصر.

*لو علي الدائري وماششين عادي كده ولاقيت الناس اللي حوالييييك مستغربين وبيسالوو بعضهم هوا مفيش حادثه انهارده ولا ايه لان بقي الطبيعي دلوقتي الحوادث يبقي انا اكككييييد في مصر.

*لو شفت ردم وتكسسسير وتراب وبلا ازرق في كل حته ومش لاقينله مكان يغوروه فيه غير الشوارع اتأكد انك في مصر.

*لو دخلت سوبر ماركت ولاقيت الناس بتعبي في اخر عزمها وكأن الاكل هيخلص اعرف انك في مصر.

*لو مشيت في اي حته وسمعت الفاظ مش ولابد من الناس اللي بقي ده الطبيعي عندهم وبقي الهزار كله قلة ادب اعرف انك في مصر.

*لو ركبت اتوبيييس ولاقيت الشباب قاعديين وعامليين نايمممين او الايمان واخد حده وبيقرأو قرأن والعواجيييز وكبار السن والبنات والستتات واقفيييين عاديييي يبقي انت فيييين ؟؟؟؟؟ برافو في مصر.

*لو انعدم الضميييييير والاخلاق والذوق والادب وشوفت ده بين بعينك اعرف انك في مصر.

*لو شفت بقي البناطييل المحزئه علي البديهات والبلوزات القصيره علي الجيبات الضيقه وعليهم حجاب اعرف بقي انت في مصر.

*في حاجه بقي والله بتحسبن كل ماشوفها انا مش عارفه اقولها ازاي بس في حديييث بيقوول

عَنْ ابْنِ عَبَّاسٍ رضي الله عنهما قَالَ : مَرَّ النَّبِيُّ صَلَّى اللَّهُ عَلَيْهِ وَسَلَّمَ بِحَائِطٍ مِنْ حِيطَانِ الْمَدِينَةِ أَوْ مَكَّةَ ، فَسَمِعَ صَوْتَ إِنْسَانَيْنِ يُعَذَّبَانِ فِي قُبُورِهِمَا ، فَقَالَ النَّبِيُّ صَلَّى اللَّهُ عَلَيْهِ وَسَلَّمَ : ( يُعَذَّبَانِ ، وَمَا يُعَذَّبَانِ فِي كَبِيرٍ ، ثُمَّ قَالَ : بَلَى ، كَانَ أَحَدُهُمَا لا يَسْتَتِرُ مِنْ بَوْلِهِ ، وَكَانَ الآخَرُ يَمْشِي بِالنَّمِيمَةِ ، ثُمَّ دَعَا بِجَرِيدَةٍ فَكَسَرَهَا كِسْرَتَيْنِ ، فَوَضَعَ عَلَى كُلِّ قَبْرٍ مِنْهُمَا

كِسْرَةً . فَقِيلَ لَهُ : يَا رَسُولَ اللَّهِ ، لِمَ فَعَلْتَ هَذَا ؟ قَالَ : لَعَلَّهُ أَنْ يُخَفَّفَ عَنْهُمَا مَا لَمْ تَيْبَسَا ، أَوْ إِلَى أَنْ يَيْبَسَا صدق رسووول الله

يعني النميمه وعرفناها انما بقي اللي بيحصل في الشارع عيني عينك كده واللي بيعمل كده اللي مبيراعييييش ناس ماشي ولا قرف بيتعمل يعني بقي ياريت الناس دوول بجد يخلو عندهم دم بقي وفعلا الكلام ده مبيحصلش غييير في مصر.

*في بلاوي ومصايب والله بشوفها كل يووووم ومش قادره اعمل حاجه مشكلتنا بقت مشكله مجتمع ووعي وذوووق وضمييير واخلاق ومبادئ يتري نطبق ايه ولا ايه ولا نمسك في ايه ونسييب ايه

ديه امثله بسيطه من اللي الواحد بيشوفها كل يوم واكيييد كلكو بتشوفو الكلام ده

وياريت كل واحد يبتدي بنفسه لعل حالنا يتصلح في يوووم من الايام

بس انا حاطه نيه ان من رأي منكرا فليغيره اينعم انا بغيره بقلبي ولساني بس عشان مش في ايدي حاجه بس اهيه بدايه ااننا نتكلم ونظهر عيوبنا واخطائنا وبلاوينا ونحاول نغيرها يمكن نتغيرر ويتصلح حالنا في ييييييوم من الايام.

السبت، 14 مارس، 2009

دعوه للتصالح

لا اله الا أنت سبحانك انى كنت من الظالمين . رب انى كلي ذنوب وأنت العفو الغفور .لا اله الا أنت سبحانك انى تبت اليك وانى من المسلمين فتب علىّ انك أنت التواب الرحيم.لا اله الا الله واستغفر الله لذبنى وللمؤمنين والمؤمنات.رب اغفر لى ولأمة نبينا محمد صلى الله عليه وسلم مغفرة عامة وارحمنى وأرحم أمة نبينا محمد صلى الله عليه وسلم رحمة عامة . رب أغفر و أرحم وأنت خير الراحمين .ربا ان تعذبنا فانا عبادك وان تغفر لنا فانك أنت العزيز الحكيم . يا أرحم الراحمين . يا ارحم الراحمين . يا أرحم الراحمين برحمتك نستغيث فأغثنا وابدل سيئاتنا حسنات وأقرر عين نبينا محمد صلى الله عليه وسلم بى وبأمته.ياسلام سلمنى من كل أمر فى حياتى ويوم أموت ويوم أبعث حيا.رب أنت ولىّ فى الدنيا والاّخرة توفنى مسلما والحقنى بالصالحين .وسلام على المرسلين والحمد لله رب العالمين
يا ريت يا جماعه نجعلها دعوه للصلح ونفتكر الموت وان الدنيا فانيه ونتصالح مع بعض
انا دخلت عن خيخه وقريت عندها الدعاء بتاع التصدق بالعرض
اللهم اني اشهدك اني تصدقت بعرضي علي من ظلمني يا رب يا رب سامحنا كلنا واعفو عننا ارزقنا حسن الخاتمه والله يا بجد الدنيا ما تستاهل حد يزعل من حد
بالله علي اي حد يدخل عندي وزعلان مني اني ضايقته ولا قولتيله حاجه زعلته انه يسامحني لوجه لله تعالي
ربنا يكرمكو كلو يا رب ويرزقنا كلنا حسن الخاتمه.اميييييين


الأحد، 25 يناير، 2009

سياسات البطييييييييييييييييييييييييييييخ!!!!!!!!!!!!!!!!!!!!!!!!!!


الله عليه !! البطيخ يالهويييييييييي بموت فيه ومع جبنه اسطمبولي بقي
ورغيف عيش سخن كده بقي يا نهاررررررر اتصدق جوعت!!!!!!!!!
ولا بقي مع منجايه في الحر اوعي وشك بقي بجد بطيخ بطيخ يعني مش اي
حاجه يعني !!!!!! حط بقي معاهم حبة عنب كده ومشميتين لا لا لا يا
جماعه انا عايزه بطيخ بقي دلوقتي ماليش فيه انا عايزه ثمره اثمرولي
بطيخه!!! ايه اللي انا بقوله ده خلاص اهه هدخل في الموضوع
بعد تفكير وتمحيص وتشخيص وتمعن وتفنن وتمكنن اكتشفت ان البطيخ مش
مجرد ثمره بناكولها وخلاص ؟؟؟؟؟؟؟؟ ها ها ها كلا البته
انا اكتشفت ان البطيخ له سيايه يا جدعان !!!!!!! أيون سياسه
وربنا سياسه بكل ما تحتويه الكلمه من معني (يالهوي انا بقيت برطن
بالنحوي لووووولي) ماعلينا اكملكو بقي
سياسه البطيخ ..فكر كده حضرتك لحظه معايا غمض عينيك وطلع لسلنك
وطرطء ودانك وارجع بذاكرتك لوراه وانت رايح بتشتري بطيخه!!!!!
تدخل علي البياع سبع اسد سلطان زمانك تبص للبطيخ كله نظرة ثقه
اتقان وتنشن علي واحده وتقعد تخبط وترزع والبياع يقولك خد ديه
تقوله لا هيه ديه يقولك طب ديه وتقوله لا اخودشي غير ديه هيه ديه
وقلبك كده مسبشر خير انها تطلع حمرا وتاخدها وتروح عالبيت وايه
هاتو سكينه !!والحاجه تقولك منصور يابني ان شاء الله حمرا يا ضانيا
قلبي حاسس والله والحاج يقولك لا والله وعافارم عليك وعرفت تنقي وا ولاه
وتلاقي اخواتك مبرقين ومستنين بقي والناس يباركولك ودي باين عليها
بطيخه ايه واوعي يا جدع!!!!
وتأتي اللحظه الحاسمه وتشق البطيخه وتلاقيها قرعه ان ان ان اااان
تشششششششششششش اول حاجه تلاقي الحاجه تقولك انا كان قلبي حاسس انها
قرعه اساسا نظرتها من الاول البطيخه ديه مش مريحاني وتلاقي الحاج
يقولك اتحمل بقي نتيجة غلطتك واطفحها لوحدك واخواتك يقرفو منك
والجران يضحكوا عليك!!!!!!!!
يا تري ايه اللي الواحد ممكن يعملو في الحاله ديه ؟؟؟؟؟ ناس كتيير
اوي بتتقبل البطيخه علي قرعها وتقول اهيه مع حتة جبنه ولقمه
تتبلع واهي ماشيه وخلاص وواحد تاني علي اقرب مقلب زباله يقوم
راميها ولاعن اليوم اللي اشتري فيه بطيخ ومبطله اساسا
وواحد تالت يصر انه يرجعها للراجل وياخد بدالها واحده حمرا
وميستسلمش ابدا !!!!!!!!!
بس عادة الناس بتختار الحل الاولاني اهي حتة جبنه ونبلعها ونعيش
طعمها وحش مش مشكله مش مبلوعه مفيهاش حاجه
السؤال بقي يا تري انت هتختار انهي سياسه من سياسات البطيخ
علي اعتبار انها هي اللي ماشيه حاليا في البلد!!!!!!!!!