الأحد، 29 مارس، 2009

مفروسه ومتغاظه وهتطق


والله ما عارفه ابدا منيييين

مأنا كل ماقول وانا مالي اشوف حاجه افظع من اللي قبلها !!!!!!!!!!!!! طيب وبعدين معاكو يا بشر وبعدين يا مصرييين هنتغير امتي هيتصلح حالكو امتي حد يرد ويجاوب عليا يا جدعان الا انا نافوخي بيضرب مش هيضرب

بقي انا وانا في الكليه كنت بركب المتروو واقعد في عربيه السيدات وانزل التحرير المحطه اللي قدام المجمع واركب تاكسي انا واصحابي للزمالك عشان اروح كليتي لحد هنا جميييل .... خمس سنين وانا علي الحال ده اتاريني مكنتش بشوف حاجه وكنت اما اسمع حد يقول شوارع مصر ولا زباله ولا اولاد شوارع ولا اي حاجه اهت فيه واقوله يا مفترين يا ظلمه يا كفره فييييييين ده مانا بنزل كل يوم والبلد زي الفل!!!!!!!!! اتاري المترووو والتحرير والزمالك كانو شايللين عني كتتتتتتتتتتتتتتتتير كتتتتتتتتتتتتتتتتتيييييييير

وبعد ماشتغلت الحمد لله وبدأت العربيه اللي بركبها تمشي بييا لارض الواقع واشوووف الناس بقي بخيرها ببهاريزها بسلططتها وبابا غنوجها شووووووفت اللي عمري ما شوفته واأتأكدت اني اكيييدد اكيييييييييييد في مصر.......واليكم يا ساده ما ااراه كل يووم واتأكد منه اني اكييدفي مصررر وااللي يشوفه يتأكد بقي انه في مصر بقي

لو شفت

******

*صندووووق زباله كببببببببببيييير يعني من الاخر كده مقطوره قالبنها صندوووق والناس تسسسيب الصندوق وترمي بره حوالليه اعرف انك في مصر.

* شواررع كانت تمام وكويسه وتتكسر عشان المجاري وتترصف وتتكسر تاني عشان الصرف وتترصف وتتكسر تاني عشان العاز وتترصف وتتكسر رابع عشان خاطر المقاول وتترصف وتتكسر خامس عشان خاطر عيوون حد تاني وتترصف وتتكسر سادس بقي عشان خاطر عيون حد برضو مش هقول ومييييين وفي الاخر تتساب متكسره او تترصف مدغدغه واي كلام يبقي انت اكيييييييد في مصر.

*لو ماشي في طريق سريع وتقعد تتشاهد وبمعدل كل دقيقه تقول يا رب سلم عشان لا السواق اللي راكب معاه مراعي الارواح اللي راكبين معاه ولا العربيات اللي حوالييك مراعيه ده يبقي انت اكييييد في مصر.

*لو علي الدائري وماششين عادي كده ولاقيت الناس اللي حوالييييك مستغربين وبيسالوو بعضهم هوا مفيش حادثه انهارده ولا ايه لان بقي الطبيعي دلوقتي الحوادث يبقي انا اكككييييد في مصر.

*لو شفت ردم وتكسسسير وتراب وبلا ازرق في كل حته ومش لاقينله مكان يغوروه فيه غير الشوارع اتأكد انك في مصر.

*لو دخلت سوبر ماركت ولاقيت الناس بتعبي في اخر عزمها وكأن الاكل هيخلص اعرف انك في مصر.

*لو مشيت في اي حته وسمعت الفاظ مش ولابد من الناس اللي بقي ده الطبيعي عندهم وبقي الهزار كله قلة ادب اعرف انك في مصر.

*لو ركبت اتوبيييس ولاقيت الشباب قاعديين وعامليين نايمممين او الايمان واخد حده وبيقرأو قرأن والعواجيييز وكبار السن والبنات والستتات واقفيييين عاديييي يبقي انت فيييين ؟؟؟؟؟ برافو في مصر.

*لو انعدم الضميييييير والاخلاق والذوق والادب وشوفت ده بين بعينك اعرف انك في مصر.

*لو شفت بقي البناطييل المحزئه علي البديهات والبلوزات القصيره علي الجيبات الضيقه وعليهم حجاب اعرف بقي انت في مصر.

*في حاجه بقي والله بتحسبن كل ماشوفها انا مش عارفه اقولها ازاي بس في حديييث بيقوول

عَنْ ابْنِ عَبَّاسٍ رضي الله عنهما قَالَ : مَرَّ النَّبِيُّ صَلَّى اللَّهُ عَلَيْهِ وَسَلَّمَ بِحَائِطٍ مِنْ حِيطَانِ الْمَدِينَةِ أَوْ مَكَّةَ ، فَسَمِعَ صَوْتَ إِنْسَانَيْنِ يُعَذَّبَانِ فِي قُبُورِهِمَا ، فَقَالَ النَّبِيُّ صَلَّى اللَّهُ عَلَيْهِ وَسَلَّمَ : ( يُعَذَّبَانِ ، وَمَا يُعَذَّبَانِ فِي كَبِيرٍ ، ثُمَّ قَالَ : بَلَى ، كَانَ أَحَدُهُمَا لا يَسْتَتِرُ مِنْ بَوْلِهِ ، وَكَانَ الآخَرُ يَمْشِي بِالنَّمِيمَةِ ، ثُمَّ دَعَا بِجَرِيدَةٍ فَكَسَرَهَا كِسْرَتَيْنِ ، فَوَضَعَ عَلَى كُلِّ قَبْرٍ مِنْهُمَا

كِسْرَةً . فَقِيلَ لَهُ : يَا رَسُولَ اللَّهِ ، لِمَ فَعَلْتَ هَذَا ؟ قَالَ : لَعَلَّهُ أَنْ يُخَفَّفَ عَنْهُمَا مَا لَمْ تَيْبَسَا ، أَوْ إِلَى أَنْ يَيْبَسَا صدق رسووول الله

يعني النميمه وعرفناها انما بقي اللي بيحصل في الشارع عيني عينك كده واللي بيعمل كده اللي مبيراعييييش ناس ماشي ولا قرف بيتعمل يعني بقي ياريت الناس دوول بجد يخلو عندهم دم بقي وفعلا الكلام ده مبيحصلش غييير في مصر.

*في بلاوي ومصايب والله بشوفها كل يووووم ومش قادره اعمل حاجه مشكلتنا بقت مشكله مجتمع ووعي وذوووق وضمييير واخلاق ومبادئ يتري نطبق ايه ولا ايه ولا نمسك في ايه ونسييب ايه

ديه امثله بسيطه من اللي الواحد بيشوفها كل يوم واكيييد كلكو بتشوفو الكلام ده

وياريت كل واحد يبتدي بنفسه لعل حالنا يتصلح في يوووم من الايام

بس انا حاطه نيه ان من رأي منكرا فليغيره اينعم انا بغيره بقلبي ولساني بس عشان مش في ايدي حاجه بس اهيه بدايه ااننا نتكلم ونظهر عيوبنا واخطائنا وبلاوينا ونحاول نغيرها يمكن نتغيرر ويتصلح حالنا في ييييييوم من الايام.

هناك 19 تعليقًا:

شفقة هانم واحسان بك يقول...

ادعى ان حالنا يتصلح ولو انه لو اتصلح متبقاش دى مصر
للاسف كل حاجة سيئة ندور عليها نلاقيها موجودة عندنا اظاهر اننا خدنا على كده ولا اتغيرنا مش هتبقى دى بلدنا

واحدة مفروسة يقول...

عادى يا فنانة
ما هيه كل الحاجات ديه اللى فرستنى و مدخلاني اهو فى دور اكتئاب و مخلياني مش بخرج من البيت
تفتكري و سايبنى فى حالى ابدا
تلاقى الجارة من الدول ام الخير اللى عندها بتنضف
تغسل الشبابيك بجرادل مية و مالهاش دعوة الميه ديه رايحة فين
و لا اللى يحبك يجيب العامل يدقدق كل يوم من 4 الى منتصف الليل
تقوليش البيه النجار موظف و بيجي بعد مواعيد العمل؟
و غيره و غيره
انا خلااااااااص مش عارفة اعمل ايه فى الفرسة الكئيبة اللى انا فيها
و بعد ده كله تلاقى اللى يقولك
و انتى مفروسة ليه يعنى الل 80 مليون مش مفروسين و انتى اللى حتتفرسي؟؟
اتفرس اكتر يا اختى و الله
تحياتي و فكرتيني

dr.lecter يقول...

يبقي انت اكيد اكيد في مصر

مشوار المترو ده بيخليني اشوف العجب لا ده بهدله ايام المحور والدائري كانت ارحم والله اه صحيح عملت حادثه مرتين ادام دار الفؤاد بس علي الاقل ماتفعصتش ولا اتخنقت ولا اتصدعت بالبؤس اللي بشوفه يوميا في المترو

اوووووه ادفع نص عمري وارجع اتبهدل بهدله الدائري والمحور مره تانيه علي العذاب بتاع الفتره دي

اما حكايه هما نايمين ليه الشباب وماحدش بيقوم طب ايه اللي يخلي الست اصلا تيجي في عربه الرجال فاكره الجنتله يعني بتجري في دمنا ولا هو استعباط وخلاص ؟

samaa يقول...

كل واحد بيقلد التانى فى اللى بيعملة وبالذات فى الوحش وهى دية القاعدة وكل واحد يقوللك اشمعنا انا ما غيرى بيعمل وهودة بقا العادى

تسنيم حسين يقول...

السلام عليكم ورحمة الله وبركاته

قال تعالى:(لا يغير الله ما بقوم حتى يغيروا ما بأنفسهم)...
احنا لازم نرجع لربنا الأول ونغير من نفسنا ونحاول تغير اللى حوالينا عشان ينصلح حالنا....هدانا الله جميعا واصلح من حالنا...
موضوع جميل جزيتى خيرا

والسلام عليكم ورحمة الله وبركاته

فاتيما يقول...

و الله يا ياسمينا أنا بعمل بكلمة غنتى قولتيها لأنها اللى أقدر عليها
و هيا إنى أبدأ بنفسى و كنت بعلم يوسف لأخر يوم كان معايا فيه احترام الغير و حق المجتمع ...
بس للأسف السلوكيات دى نتاج يأس و إحساس البعض إن البلد دى مش بتاعتهم و حد تانى اللى بيستمتع بخيرها مش هما
و بالتالى ملوش لزوم يحافظوا عليها
و يا حبذا لو أفسدوها عشان غيرهم ما يلحقشى يستمتع ...
هقولك إيه بس
الموضوع حلو و بيوجع
سلامى لماما و أسفة لأنى إتأخرت عليكى

د/أبويحيى وادم يقول...

السلام عليكم ورحمه الله وبركاته

السادة الأفاضل زوار مدونتي الأعزاء ، أساتذتي الفضلاء ، إخوتي من المدونين والمدونات ،أصدقائي الأعزاء
تحية طيبة وبعد
أتشرف بدعوتكم اليوم إلى زيارة مدونتي ( مدونة ادم ويحيى ) وذلك بصفتكم أحد الشركاء الأساسين فيها بآرائكم وتعليقاتكم على موضوعاتها وزيارتكم لها
لحضور ندوة بعنوان

( ادم ويحيى ، تجربة تدوين )

اليوم هو استفتاء على تجربة تدوين

اليوم نعرف من هو أبو يحيى وادم وكذلك ادم ويحيى من هم ومن والدتهم

اليوم نعرف حقيقة هذه المدونة وما هي رسالتها الحقيقة وهدفها

اليوم رسالة اعتذار لكم عن بعض الأمور

اليوم رسالة شكر من كل قلبي على أمور أخرى

اليوم استفتاء حول منهج مدونة ادم ويحيى

اليوم هو رسالة منكم لي حول ما طالعتموه بيوم من الأيام بهذه المدونة
فأرجوا أن لا تبخلوا على بتعليقكم على هذه ألتدوينه
في انتظار زيارتكم
والسلام عليكم ورحمة الله وبركاته
د/أبو يحيى وادم

أحسن تـستاهـل يقول...

بصي.. انا داخلة اتخانق واحدف كرسي في الكلوب

انتي فين يا هانم انتي يا هانم يا هانم انتي؟؟

ولا تلافون ولا نوبايل؟؟ تلاقيني ولا باجي على بالك كمان؟؟

وهنت عليكي؟؟ اخص عليكي اخص
لا اخص بجد اخص

لأ اوعي كده انا واخدة على خاطري

هه

بس

مها ميهوووو

محمد التميمى عبدالحق يقول...

ههههههههههههه
ليه الفرسة دى اهدى شوية معلهش
www.eltamemy.blogspot.com

spider boy يقول...

السلام عليكم يافنانة

تفتكرى أن كل الناس فى مصر معندهمش دم مفتكرش

وأعتقد أن فى يوم من الأيام مصر هتغير فى اليوم ده

المهم بجد فعلا بلوج رااااااااااااااااااائع.

Mohannd

... amr يقول...

مممممم .... عموما .. سيبك انتي من كل دة ... كل سنة و انتي طيبة !! سوري .. قصدي ألف ألف مبروك على الخطوبة يا فنانة :) ربنا يرزقك الذرية الصالحة ان شاء الله

موناليزا يقول...

عرفت حالا من فاتيما انك اتخطبتى
الف مبروووووووك ياحبيبتى وربنا يتمم بخير

سومه...مجنونه فى بلد عاقل يقول...

كل سنه وانتى طيبه يا مفروسه

أحسن تـستاهـل يقول...

رمضاااااااااااان كريييييييييم

مها ميهوووو

فاتيما يقول...

هوه اللى اتخطبت متعرفناش تانى و لا إيه؟؟
يا بنتى انتى فيييييييين ظ
وحشتينا و نداء لكل من يهمه الامر
عودى يا ياسمينا يا حبيبتى وحشتينااااااااااااااااااااااا
و طمنينا عليكى
ممكن؟

انا مش معاهم يقول...

كل سنه وانت الي الله اقرب

واحدة مفروسة يقول...

انتى فين يا فنانة؟؟؟
كل سنة و انتى طيبة و بخير يارب

sony2000 يقول...

اولا بجد بوست رائع وقدرتي تكتبي عن البعض موش الكل
ثانيا بجد احنا محتاجين اننا نغير من نفسنا :لا يغير الله ما بقوم حتي يغيرو مابأنفسهم
ياريت يجي اليوم اللي الاقي فيه بلدي احسن بلد فالدنيا ياااااااااااارب
اللهم امين

ساعد الاسماعيلي الايمن يقول...

عندك حق ياأستاذة مفروسة...
فعلا الالمبالاة والاهمال بقت ثقافة عندنا
وأقول لك علي حاجة كمان
انا بحكم غربتي أكتشفت اننا كمصريين أكتر ناس متنشننين وللأسف تلاقي بقيت الجنسيات ريلكس خالص ومتسامحين ولو صدف ووقفت في طابور الاقي ال بيتحنقوا في الطابور هما بس المصريين..طيب ليه المصريين دوناً عن بقيت الناس أنافكرت كتير و حاولت الاقي حل للسؤال دة وبعد تفكير عميق ومضني عرفت الاجابة
عارفة أكتشفت ايه؟؟؟
أكتشفت أن طابور العيش أثر فينا
يعني كونك واقفة تجيبي بجنيه عيش ومعندكيش أحساس بالامان أن وقفتك ال بقالها يجي اكتر من 3 ساعات في الطابورممكن تحترم وتحصلي ع العيش
لذلك أحنا فقدنا الاحساس بالامان وبالتالي بالنظام..شكرا وأسف للأطالة